ភ្នំពេញ៖ បងប្រុសរបស់នាយករដ្ឋមន្ត្រី សម្ដេចតេជោ ហ៊ុន សែន គឺលោក ហ៊ុន ណេង ដែលទើបទទួលមរណភាពកាលពីថ្ងៃទី៥ ខែឧសភា ដោយសារគាំងបេះដូង ត្រូវបានព្រះមហាក្សត្រ ប្រទានគោរមងារជា «សម្ដេចឧត្តមទេពញាណ»។

ក្នុងព្រះរាជក្រឹត្យចុះថ្ងៃទី៧ ខែឧសភា ឆ្នាំ២០២២ ព្រះមហាក្សត្រព្រះបាទ នរោត្តម សីហមុនី ទ្រង់យល់ថា លោក ហ៊ុន ណេង គឺជាអ្នកដឹកនាំមានស្វាមីភក្ដិចំពោះរាជបល្ល័ង្គ ការពារនិងគោរពព្រះពុទ្ធសាសនា ការពារយុត្តិធម៌សង្គម ដើម្បីនិរន្តភាពរាជានិយម នៃព្រះរាជាណាចក្រកម្ពុជា ទ្រង់បានត្រាស់បង្គាប់ឱ្យផ្ដល់គោរមងារនេះដល់លោក ហ៊ុន ណេង តែម្ដង។

គួរឱ្យដឹងផងដែរថា បងប្រុសរបស់សម្ដេចតេជោគឺលោក ហ៊ុន ណេង បានទទួលមរណភាពក្នុងជន្មាយុ ៧២ឆ្នាំ កាលពីល្ងាចម៉ោងប្រមាណ ៦និង២៥នាទី ថ្ងៃទី៥ ខែឧសភា ឆ្នាំ២០២២នេះ ដោយសារគាំងបេះដូង។ បច្ចុប្បន្នសពរបស់លោក ហ៊ុន ណេង ត្រូវបានក្រុមគ្រួសារដាក់តម្កល់នៅគេហដ្ឋានក្នុងខេត្តកំពង់ចាម មុននឹងដង្ហែរទៅបញ្ចុះនៅវត្តសុវណ្ណគិរីរតនៈភ្នំប្រុស ភូមិត្រពាំងចារ ឃុំក្រឡា ស្រុកកំពង់សៀម ខេត្តកំពង់ចាមនៅថ្ងៃទី៩ ខែឧសភា ខាងមុខ។

បច្ចុប្បន្នអ្នកដែលទទួលគោរពងារពីព្រះមហាក្សត្រមានចំនួន ១០រូប ដែលមានដូចជា សម្ដេចវិបុលសេនាភក្ដី សាយ ឈុំ សម្ដេចពញាចក្រី ហេង សំរិន សម្ដេចធម្មវិសុទ្ធវង្សា សៅ ទី ហេងសំរិន សម្ដេចតេជោ ហ៊ុន សែន សម្ដេចកិត្តិព្រឹទ្ធិបណ្ឌិត ប៊ុន រានី ហ៊ុនសែន សម្ដេចក្រឡាហោម ស ខេង សម្ដេចពិជ័យសេនា ទៀ បាញ់ សម្ដេចចៅហ្វាវាំង គង់ សំអុល សម្ដេចធម្មពោធិសាល ជា ស៊ីម (មរណភាព) និងសម្ដេចវិបុលបញ្ញា សុខ អាន (មរណភាព)៕